Сојузот за младинска работа (СМР) е мрежа на понудувачи на младинска работа – младински организации и организации кои работат со и за младите – посветени на регулирање и стандардирање на младинската работа, поддршка на младинските работници и подигнување на јавната свест за значењето на младинската работа.

СМР е основан како резултат на иницијативата за признавање и професионализација на младинската работа, спроведена од Центар за меѓукултурен дијалог (ЦИД) во соработка со Националниот демократски институт (НДИ). Основачкото собрание се одржа на 13.06.2013 година, кога Сојузот ги обедини дел од најзначајните актери во полето на младинската работа во Македонија со цел младинската работа да се препознае како клучна алатка за позитивен личен и социјален развој на младите.

Денес, Сојузот за младинска работа е значаен партнер на институциите и граѓанскиот сектор во креирањето и мониторингот на младинските политики. Меѓу позначајните процеси се вклучувањето во спроведувањето на Законот за младинско учество и младински политики (особено во делот за основање младински центри), креирањето и спроведувањето обуки за работници со млади и соработката со Институтот за социјална работа и политика при основањето постдипломски студии во полето на младинската работа.