Младинската работа во Македонија се уште не е целосно препознаена како професија, па лицата кои професионално се занимаваат со младинска работа не можат да бидат вработени како младински работници.

Портфолиото на младински работници е документ подготвен преку широк консултативен процес со сите чинители во полето на младинската работа, а издаден во 2019 година заеднички од страна на Сојузот за младинска работа, Агенција за млади и спорт и Националниот младински совет на Македонија. Во овој документ се дефинирани трите профили на младински работник во Македонија, коишто се разликуваат според делокругот на работа, правата, обврските и степенот на автономија во работата, а согласно на тоа, и според компетенциите што се потребни да ги поседуваат заради успешно извршување на задачите. Трите профили се:

• Работник со млади
• Дипломиран младински работник 
• Експерт за младинска работа

Во моментов во Македонија формално постојат првиот и третиот профил.

Работник со млади какопрофил на младински работник е воспоставен со усвоениот стандард на занимање за Работник со млади од 2018 година. Врз основа на овој стандард, од страна на СМР во 2020 година беше акредитирана и првата програма за образование на возрасни за занимањето Работник со млади.

До мај 2024 година, вкупно 43 лица имаат успешно завршено една од двете верификувани програми и имаат добиено сертификати за Работници со млади.

Од академската 2023/24 година во Македонија постојат постдипломски академски студии по Младинска работа. Програмата се спроведува на Филозофскиот факултет при Универзитетот „Св. Кирил и Методиј“ и опфаќа 4 задолжителни и 3 изборни предмети. Студентите можат да се стекнат со вкупно 60 ЕКТС.

Професионализацијата на младинската работа е тесно поврзана со постоењето на стандардизиран пристап во образованието на младински работници. Сојузот за младинска работа ќе продолжи да работи на создавање услови за воспоставување и на додипломски студии по младинска работа. За таа цел, СМР активно соработува со Филозофски факултет и со универзитети од други земји од Европа кои нудат студиски програми по младинска работа.