Со донесувањето на Законот за младинско учество и младински политики во јануари 2020 година, за прв пат во Македонија беа дефинирани младинските центри како еден од видовите сервиси за млади. Со донесувањето на овој закон беше воведена и обврска за сите општини да овозможат функционирање на најмалку еден младински центар во рок од 5 години од донесувањето на законот. 

Првите четири младински центри во согласност со Законот беа основани во Битола, Велес, Кавадарци и Куманово, во соработка помеѓу локалните самоуправи, Агенција за млади и спорт, и Сојуз за младинска работа. Оттогаш, младински центри беа отворени и во општините Пробиштип, Охрид и Липково, со што вкупниот број на младински центри се зголеми на 7. Во меѓувреме, уште неколку други општини започнаа со процес на основање младински центри.

Со цел стандардизација на пристапот и квалитетот на работа во младинските центри основани во согласност со Законот, во соработка помеѓу АМС, СМР и другите релевантни чинители беа подготвени Стандарди за квалитет на младинските центри, кои АМС ги усвои како Правилник. Врз основа на овој Правилник, со поддршка од АМС, СМР разви процес и методологија за оценување и подобрување на квалитетот на младинските центри. Методологијата беше пилотирана во 6 младински центри во почетокот на 2024та година. Оценувањето беше спроведено од страна на Базата на оценувачи на стандарди за квалитет на младинските центри на Агенција за млади и спорт.